ستروبيا

ستروبيا هي دولة اللوالبة .. تقع جغرافيا في الشمال الشرقي لمخيلتي ... رئيسها ( عبده مؤبد ) و حكومتها رشيدة و نظيفة بقيادة وزيرها ( برسيل أوتوماتيك ) و الحياه حلوة ..

أما شعب ستروبيا شعب ابن حلال أويييييييييييييييييييييييي .. بالمنافقين و المدلكاتية و المعر .......... ضينها أوي في وش الحكومة اللطيفة دي

ده ما يمنعش وجود الشرفاء و المناضلين و الأبطال و المعاني الوحشه دي كلها

طبعا ده هو تعريف دولة ستروبيا في كتب التاريخ و الجغرافيا و الكيميا و الفيزيا من أول ابن الأثير لحد ابن المتنا ......... زل عن حقه

نويت انزل حلقات عن ستروبيا أتمنى تعجبكم

انتظرونا قريبا على المدونة

و أتمنى تعليقات لأني نفسي أتشرف بمعرفة مين شرفني بزيارته الكريمة

سلام عليكم

إزيّ الحال ؟

طبعا كلنا عرفنا بدخول الطيران الإسرائيلي للأجواء المصرية و ضرب صاروخ أدى لمقتل 3 ضباط مصريين ..و الأكيد إن مفيش رد فعل رادع لكل ده لأن واضح إن ( عظمته ) كان في الحمام ساعتها .. يعني إيه الكلمات الرنانه : نخوه .. شهامه .. رجولة .. كرامه ؟إذا لقيتوا الإجابة يا ريت حد يبعت لي على 09000121955944

طبعا فيه كام مشهد استفزني على المستوى الداخلي

*
مدرس
الميم :- مادة علمية
الدال :- دقة في الأداء
الراء:- رأفة بالتلميذ
السين :- سلوك المعلم الحسن
ده تعريف الحزب الوطني لكلمة ( مدرس ) و اللي لقيته في إحدى مذكرات كلية التربية دفعة دبلومة التفرغ لمادة التربية و قضايا العصر

*
إحدى سكرتيرات كلية تربية رياض أطفال حبت تهزر مع العامله هزار بايخ .. و الظاهر فيه عشم بينهم .. فالعاملة ردت عليها رد ما عجبش السكرتيرة ( الواصلة ) .. و قامت رايحه مبلغه الدكتورة " س " بالكلمة اللي جرحت مشاعرها .. فما كان من الدكتورة إلا إنها تربصت بالعاملة الغلبانه و هيا رايحه تجيب دوا من الصيدلية اللي قدام الكلية .. و ثبتتها قدام موقف السرفيس .. و قالت لها نصّا " إنتي اللي زيك حتة زبالة .. لازم تعرفي انتي بتكلمي مين .. إحنا أسيادك .. فاهمه يا بت ولا لأ ؟ " و طبعا هاسيب لخيالكم الانهيار اللي جه للعامله

*
موقف حصل لي شخصيا .. لما جالي " أحدهم " من جيل الشباب الخنفس ( خريج معهد دلتا 4 سنين ) و طلب مني صيغة طلب شخصي لوظيفة .. قعدت امليه .. الواد بيكتب هيراطيقي تقريبا لأن الخط الزبالة ده ما كانش عربي .. و بيحفر الورقه بالقلم و يكتب الكلمة الواحده ف دقيقتين .. ورقة بردي بروح أمه .. المهم قعدت امليه و بلاد تشيلني و بلاد تحطني .. و أخيرا وصلنا لخاتمة الطلب .. فمليته " و الله من وراء القصد " .. لقيت أسمى معاني الهبل اترسمت على وشه و هو بيسألني " يعني إيه دي " .. عشان ما احرقش دمي قلت له " اكتب يا بني .. و الله ُ من وراءِ القصد " .. رد عليا " يعني إيه دي ؟ " .. قلت له و انا على حافة الشلل " اكتب يا حبيبي .. و الله من وراء القصد " .. رد بلهجة العالم بالأمور " إهئ .. ليفتكروني بادعي عليهم " .. و طبعا باكتب لكم دلوقتي بعد رجوعي من العناية المركزة

*
أحد الواشين من إحدى مناطق قوات الأمن اللولبية بلغني إنه ماسك أمن و تحريات في منطقته .. و الضابط بتاعه قال له يعمل شغل .. و لما حب يعمل الشغل التمام اكتشف ان فرن الوحدة ما جالوش دقيق من 3 أيام في حين إن الدفاتر متظبطه و تمام التمام .. و شحنة الدقيق اليوميه بتعمل شئ و شويات ( 18000 جنيه مصري ) نضربهم في 3 يبقوا بالصلاة على النبي يجوزوني من بدري .. الأكيد انه لما جه يبلغ الضابط بتاعه اكتشف إن الضابط قاسم مع الفران و السواق اللي بيجيب الشحنه و مدير المنطقه .. و طبعا مش عايز اقول لكم إني قابلته جنبي في نفس العناية المركزه .. و كل عام و أنتم بخير

* تنويه صغير : دي بعض المقتطفات الحياتية من جمهورية ستروبيا المهلبية الشقيقة .. و السلام عليكم و رحمة الله

أنا باكره إسرائيل

الطبيعي و بكره عندي امتحان إني ألمّ نفسي شويه و اقعد اذاكر
تقريبا مش باتفرج على تليفزيون غير قناة الجزيره و نادرًا كمان
بس كله شايف الموقف شكله إيه
مش محتاج انوّه عن مدى الخسه الصهيونيه
مش محتاج أعلن عن مدى بطولة و صمود الشعب الفلسطيني
مش قادر أكبت غضبي من إغلاق المعبر
المفروض ان بعض الأخوة مدونين و مدونات كانوا عاملين زيارة النهارده
لمستشفى الهلال الاحمر في رمسيس
لتقديم كل اللي يقدروا عليه من معونات ماديه إلى وقفة نفسيه
طبعا كل ده لسه عارفه الوقتي حالا و ده اللي استفزني أكتب البوست ده
تحيه للأخوة المدونين و المدونات اللي بجد أثبتوا جداره يحسدوا عليها
و كما قال نبي الله (موسى) عليه السلام
" السلام على من اتبع الهدى "
السلام على الشعب الفلسطيني
و باكره دين ... أم إسرائيل
و صحّ النوم يا عرب ..
سلام عليكم

آآآآآآآآآآآآآآآآآآآآآآآآآآآسف على التأخير

طبعا آسف على التأخير و لمدة ثلاث شهور و خمسه و اربعين قرش تقريبا بس اعذروني .. الواحد مننا لما بيتوه في دهليز الحياه ... بيخرج منه .. يلقى دهليز .. يمشي فيه شويه .. هايلاقي ف آخره باب .. يفتح الباب يلاقي دهليز .. ييجي يخرج منه يلاقي تاكسي واقف مستنيه .. يفتح باب التاكسي .. يلاقي دهليـ ... إحم .. آسف على الملل

مع كل الأفراح و الأحزان اللي الواحد شافها خلال الفتره دي أقدر أقول لكم حاجه واحده

كل عام و انتم بخير لقرب حلول العيد

كنت في رحله لمدة يومين في بورسعيد ( المدينه الباسله ) اللي لقيت بينها و بين يوتوبيا شبه حيث أن يوتوبيا ( المدينه الفاضله ) و من ( فاضله لباسله ) يا قلبي لا تحزن

قابلت هناك صديقين مش باقابلهم غير في المناسبات دي

الجميل شريف أمين ( جامعة القاهرة ) .. و المجرم عمرو حسن ( جامعة قناة السويس )

كان معايا من جامعة المنصورة فكري و ياسر و فرحات و رضوان و مصطفى

بس أهم شئ في الرحلة كان الاتنين أصدقائي شريف و عمرو

اتنين شعرا يجننوا بعد التعليق عليهم طبعا

يكفي إني اقول لهم بس شكرا للمكان و الزمان اللي بيجمعونا

شلة الفساد ( فرحات - ياسر - رضوان - مصطفى - فكري ) جامعة المنصورة

الزعيم الثورجي المناضل بلا فخر اللولبي

في ثياب و أسلحة الحرب

القتال أمام المعبد الوثني بيني و بين شريف أمين

الإتربي اللولبي في الطيران

بعد عقد السلام بيني و بين شريف بتدخل من محمد فكري ( إديني عقلك )

طبعا لا يخفى عليكم إني الطويل اللي فيهم و كنت باجرب نفسي ( في الصورة طبعا ) قدام شريف

ولا يخفى عليكم برضه إن عمرو مش موجود ف الصور .. ليه ؟؟؟؟؟

( عشان ده بس اللي وصلني من صور - عمرو استكبر يتصور جنبي - عمرو عنده مدونته و صوره عليها للي يحب يتفرج ) اختر مما بين الأقواس

إلى اللقاء قريبا و كل عام و أنتم بخير

مفاجأة

لبسنا الشبكة

طبعا هاييجي كائن حيا كان أو ميتا و يقول لي بطل نخع على دماغ اللي خلفونا

طب و الله اللي أغلى مني و منكم و من أي خلق تاني لبِّست الشبكة لنشوى

يعني دلوقتي الخطوبة بقت رسمي

ياااااااااااااااااااااااااااااااااااااااااااااااااه

أخيرا و لأول مره أحس بسعاده حقيقية

و طبعا دفعت تمن السعاده دي من قبلها للدنيا و بلاويها

بس في النهايه مفيش حاجه تغلى على نشوى

الدبلتين منقوش عليهم من بره ( نقش بارز مش حفر ) حاجه مهمه جدا

حامد(قلب) نشوى 17 / 10 / 2007

و ده طبعا تاريخ ارتباطنا يوم أربعاء

لكن تاريخ خطوبتنا الخميس 14 / 08 / 2008

طبعا شكلي زبالة في الصور عشان كنت لسه راجع من مصيف

يا مدونين إفرحولي بقى شويه كفايه نكد

يا مدونات .. أسمع أحلى زغروته

كل عام و انتوا كلكم و كل الناس بخير بمناسبة حلول رمضان و من بعده العيد

سلام عليكم

مش العبد لله نجح !!!!!!!!!!!!!!

أزيكم

وحشتوني أوي يا كل الناس

أنا نجحت

الحمد لله

قصه عجيبة جدا

طبعا ( للي ما يعرفش ) بقالي سنين كتير بدون داعي لذكر عددها كطالب في كلية آداب المنصورة .. و ده كان للأسف بمزاجي مش غصب عني .. بس كان قراري السنه دي إني أنجح بمشيئة الله ... و ده أكيد عشان نشوى .. شرط أهلها عشان نلبس شبكه نجاحي في سنه تالته .

جيت سمعت إن النتيجة في كنترول الكليه .. رحت فورا على صديقي الدكتور اللي بيعتبرني المتنبي ( دفع لي خمسين جنيه قبل كده على قصيدة سمعها مني و الله العظيم ) .. بعت فراش يجيب لي النتيجه .. و بمنتهى البساطه الفراش رجع شايل الورقة اللي شايله مصيري .

راااااااااااااااااااااااااسب 4 مواد

طبعا مش هاقدر اوصف رد فعل الدكتور ولا منظره و هو بيتصل بوكيل الكليه كمحاوله يائسه لتعديل النتيجه .. و بالفعل مَلَّى بياناتي للوكيل .. و خلصت الليله على إن هانحاول نعمل حاجه .

و طبعا مش هاوصف الإحباط اللي صابني و اتحول بعد شويه لكفر بيِِّن ... لما كلمت نشوى

أنا :- أنا يا بنتي حاسس إني باخدعك و باخدع نفسي .. إنتي ربطتي نفسك بإنسان فاااااااااااااااشل .

نشوى :- ربنا كبير يا حامد

أنا :- يا فرحتي .. ربنا كبير .. اللي ما شفت له معجزه ............

نشوى :- ( تقاطعني ) استغفر ربنا .. حرام عليك كده .. و بعدين إحنا مع بعض اهو هنروح من بعض فين ؟؟

أنا :- يعني إيه ؟

نشوى :- يعني مهما حصل إحنا اتعاهدنا إن كل واحد فينا للتاني .. نعتبر إن خطوبتنا اتأجلت سنه .. مفيش مشكلة .. المهم ارض بقضاء ربنا و استغفره .. ولا كأن حاجه حصلت .

طبعا حسيت إني صغير أوي قدامها لعدة أسباب : -
1 - إني ما كنتش متماسك زيها مع العلم إن العكس هو المفروض .
2 - إني مش عارف اكون الفارس بتاعها ( عشان مفيش فارس بيشيل أربع مواد ) .
3 - أولا و أخيرا إني ف لحظه واحده بعت إيماني بربنا و أنا اللي طول عمري ماليش غيره .

المهم تاني يوم ع الصبح رحت للوكيل أسأله عمل حاجه .. لقيته بيقول لي إن الموضوع مش هين و إنه هايعمل بالحالة بتاعتي قضية .. و قعد يسرد لي ف كلام كبير أوي .. و كل ده و لسه بياناتي راقده في ورقه على مكتبه .. الكلام ده بعد ما الكنترول قفل للعلم بالشئ .

في نفس اليوم بالليل عرفت إن النتيجه ظهرت رسميا ع النت .....

و انا باجيب كارت النتيجه على أساس إني ساقط لا محيص .. تخيلوا رنت في ودني جملة إيه ؟؟؟

" ربنا كبير " بصوت نشوى

قلت بيني و بينه " يااااااااااااااااااااااا رب .. إنت وحدك اللي عارف إني كان نفسي اخطي خطوه في إرضائك بشبكة نشوى .. و اللي كانت هاتقربنا للزواج .. اللي هو حلالك اللي شرعته .. يا رب انت عالم بأن نيتي خير .. و عارف إني أخطأت في حقك كتير .. أنا دلوقتي مش عايز من النتيجه حاجه .. أنا عايزك تسامحني بس " .. و لقيتني اطمأنيت بعدها .

دخلت على موقع الجامعه و دخلت رقم الكارت على بياناتي و ضغطت على كلمة " النتيجه " و انا باردد سيد الاستغفار " اللهم لا إله إلا أنت سبحانك إني كنت من الظالمين " و هوووووووووووووووووووووووب .. اللي هي لوووووووووووووووودينج ...

ناجح بمادتين

الله أكبر .. و سجدة شكر و لأول مره 5 دقايق

أتاري المغفل اللي جابلي النتيجه كانت قدامه مادتين شيل و مادتين رفع .. و سيادته جاب الاربعه شروه واحده .. بس انا سامحته .. أنا سامحت كل الناس .. ده ربنا سامحني ... أنا مش هاسامح ؟؟

و طبعا قعدت اعيط كتير ليلتها عشان الإنسانه اللي وقفت جنبي وقفة ماحدش وقفها جنبي .

الإنسانه اللي باعت الدنيا كلها و اشترتني

نشوى

ربنا كبير

إعلان هااااااااااااااااااام جدا

بدأنا إنتاج اسطوانة أوديو بإمكانيات في قمة التواضع

بس رغم هذا التواضع إلا إن الاسطوانه دي تسجيلها في قمة الجمال

أسطوانة " ياما شايله " ( الديوان الصوتي ) للشاعر سالف الذكر رضا أبو النجا

و تم التسجيل في استوديو " نور ساوند " للملحن الجميل جدا محمد ظريف

و محمد ظريف ده أجمل حد سمعت له رنة عود بإحساس صح

هو اللي وضع الرؤية الموسيقية ، و طبعا كلنا عارفين الفرق بين الرؤية و اللحن

بجد الاسطوانة دي هاتعجب أي حد مهتم أوي بحال البلد دي و أورام العرب

ياما شايله

( الديوان الصوتي )

أشعار و إلقاء / رضا أبو النجا

رؤية موسيقية / محمد ظريف

تنفيذ / حامد الإتربي

تم التسجيل باستوديو نور ساوند " محمد ظريف"

للاستعلام و الطلب 0121955944

تاج بوتا

التاج ده وصلني من بوتا http://www.botablogspotcom.blogspot.com/

و بوتا بنوته غريبة الأطوار و ده يرجع لكونها طالبة في هندسة ( ده تحليلي في القضيه )

المهم إنها بنت طيبة .. متميزه

شكرا لتمريرها البوست ده للعبد لله

إسمحولي بالإجابة


لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

قبر أمي - نشوى - أنا

لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟

نفسي أرضي ربنا
نفسي في صاعقه تنزل من السما على كل الأغبيا اللي قابلتهم في حياتي و علموني اللولبيه
نفسي اخلص من الفقر اللي ف حياتي

ما هو هدفك فى الحياة ؟؟

أسيب علامه أو بصمة يفتكرها لي التاريخ في التمثيل أو الشعر

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

ماحدش يضمن حاجه .. لأنك قلت إن شاء الله .. نفرض ربنا ما شاءش ؟

أجمل مقولة سمعتها فى حياتك ؟؟

النار يدوب توهب دفا .. و اللي لمسها يتحرق

من المغنى اللى بتحبه أوى و إيه أحلى أغنية ليه بتحبها ؟؟

منير ( لما النسيم )

"غزة" تمثل لك إيه فى حياتك ؟؟

فلسطين الصغيره

اعط لإنتمائك لوطنك درجة من مائة ؟؟

لو سألنا أي مصري السؤال ده مش هاتبقى الإجابة لطيفة
ما بالك لو سألنا السؤال ده لأي عربي

لو تزوجت و أنجبت بنتين و ولدين أى الأسماء تختار لهم ؟؟

نشوى - درية - محمد - يحيى

عمرك غشيت فى أمتحان و انت صغير ؟؟

ولا و انا كبير

لو أتعرض عليك رشوة كبيرة و انت فى زنقة ماليه هتعمل إيه ؟؟

أكيد هاقبل .. عشان أنا مش باشتغل غير نفسي في الوقت الحالي ..
فمش هايكون فيه وجه استفاده للراشي مني في حاجه ..

يعني أنا هاستفاد و هو هايشرب أكبر مقلب في حياته

قول 3 صفات ب 3 كلمات بس توصف بيهم شخصيتك (يعني كريم طيب خدوم كده)

عصبي - رومانسي - لولبي

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه

نيزك يقضي عليهم واحد واحد


برضه بكلمة واحدة ايه اهم صفة عايزها في شريك حياتك

إنسانه

ايه المجال اللى غير دراستك وشايف نفسك فيه قوي حتى لو كان ياشيخ الرسم عالحيطة

الشعر و التمثيل

بتحب السفر

عشان اهرب من الدنيا يا إما لوحدي يا إما بعد ما اتجوز مع نشوى

طب دلوقتى حالا ايه المكان اللى نفسك تكون فيه ؟

شقة دمياط الجديدة

تمرر التاج ده لمين ؟؟

لكل اللي ييجي يشرفني بزيارته

و رحمة أمي باحبك يا نشوى

خطيبتي نشوى

عمري في حياتي ما عشقت غيرك

ولا اتمنيت في لحظه واحده غيرك تمتلكني لآخر نقطة دم

ولا خطر في بالي إني اموت و ربنا يأذن بدخولي الجنه غير عشان تبقي انتي الحور العين بتوعي

باحبك

ملكك للأبد ما دام حيا

حامد الإتربي

مقتطفات من رباعيات ( رضا أبو النجا )

رضا أبو النجا :

أحد الشعراء اللي بجد عاليين أوي ... مش ف الشعر و بس .. كمفكر و متأمل عبقري كمان

عمره 45 سنه .. بس قلبه تحس فيه بشاب 20 سنه بس

قضى 28 سنه من عمره بره مصر ( العراق - السعوديه - لبنان ) و رجع مع الحرب الغاشمه 2006 من لبنان بعد ما قضى فيها سبع سنين من أزهى سنين حياته .. و كتب خلالها أجمل ما كتب من شعر المقاومه و السياسه

طبعا كل ده ما ينكرش انه كتب ف الغزل و كتب أغاني و غنى له غسان صليبه ف لبنان و كان فيه مشاريع مع فضل شاكر و جورج وسوف و وائل جسار بس رجوعه وقف ضد المشاريع دي .....

النهار ده اسمحوا لي أقدم له مقتطفات من رباعياته بعنوان ( ميت حي )
طبعا هايتم المقارنه بينها و بين رباعيات الراحل ( صلاح جاهين ) و لكن أرد على المقارنين مقدما بإن فلسفة رضا غير فلسفة صلاح

أرجو لكم الاستمتاع

إيـــــــدك ف إيدي نتفق على شئ

إن شـــــــا الله حتى نتفـق على آه

أصرخ و تصرخ بس إسمه طريق

أحسن ما نسكت و الصراخ ننساه

***

السطر أكبر مـن مجرد خـــــــــط

السطر مينا صريخ سرينه و شط

و انا سطري ليه ف الغرغرينا غريق

مش لاقي حتى نقطه فيه تتــــــمط

***

حاولت أطلع ع الهرم و نجحـــت

و حاولت أنزل م الهرم و فلحــــت

سألوني إيه الفرق بين الاتنـــــين

أنا قلت قلبي ف الطلوع كان تحت

***

سجلت إسمي ف دفتر الزيارات

كان حلمي اشوفك يا قمر لحظات

أخدك ف حضني و المسك بالروح

لكن قالولي معاد زيارتك فــــــــات

***

إيدك ف إيدي نتحد مع بعض

نلحق قمرنا اللي اندبح ع الأرض

جايز و يمكن ع الأكيد هانموت

لكن قلوبنا مش هاتنسى النبض

***

من ديوان الشاعر برقم 223 / 2008

دي كانت 5 رباعيات من أصل 32 رباعيه بعنوان ( ميت حي )

أتمنى أكون وفيت الراجل ده حقه في تقديمي له و ما اكونش نسيت حاجه في المقدمه

و يا رب ما اكونش تقلت عليكم و اكون نقلت لكم و لو جزء من استمتاعي

سلام عليكم

أنا الناجون و الغرقى ( للشاعر محمد ملوك )

قصيدة نبعت من ذاتياته فأتت لينة
أرجو لكم الاستمتاع

أنا الناجون و الغرقى

و أعصاب معراة

تسابق فوقها الحمقى

و غابات من الذكرى

أضعت حقائبي فيها فلم أرحل

و لم أبقَ

غدا سأبايع الحجاج في الكوفه

و حين أعود سوف أعود منشقـّا

أنا الناجون و الغرقى

نزيف غيرُ مرئيٍّ

و قنديل تحطم عندما رقَّ

صرخت فلم تعد ليلى

و جئت فلم أجد شوقا

سرابيٌّ شعاع الدفء يا ظمإي

فلا تتعب خيولا من تمنينا

و لا تتبع وراء غمامة برقا

و مقفرةٌ بيوتٌ كم رأيت بوجهها ماء

و مقفرة بيوت الروح يا مدنـًا

تؤلـِّـه ذئبها الأتقى

إذا أطعمت عصفورا

فقد أطعمت غربانا

و إن قربت قربانا

حماه الغول و العنقا

فيا ليت المفاوز لا وجود لهنَّ

أو ليت التفاتا

أورد الأرباب هذا

أوردوا الخلقَ

كأني و الحصار همُ

فرار في رياحٍ

و اتجاهاتٌ ملونة بآمال جسار

كلما اكتشفت سماءً

أرسلت لجج الغبار أمامها أفقا

فأين وصلت مكتظا بآلامي

و أين البحر مقتنعا بإبحاري

و أين عيونه زرقا

أنا الناجون و الغرقى

سألت فلم يجب أحد

و عشت فلم أجد ذاتي

و مت

فلم أجد فرقا

من ديوان ( أنت الذين أحبهم ) برقم إيداع 332 / 2008

يا ما شايله ( للشاعر / رضا أبو النجا )

قصيده من أجمل ما سمعت في العامية المصريه
أتمنى لكم الاستمتاع ........

ياما شايله ...

ياما شايله يا أرض مصر ..

ياما شايله يا بلدنا ..

شايله عشه و شايله قصر ..

شايله حانه و شايله مدنه ...

شايله حاتي و شايله آتي من زقاق العنكبوت ...

شايله حِتّْ .. و شايله حوت ...

شايله حافي و مليونير ..

شايله باشا .. و باش أجير ...

شايله نحل و منحولين ..

شايله نخل و منخولين ..

شايله شمع و كل شمعه

شايله دمع و كل دمعه

شايله صرخة ألف عين ...

شايله تحت و شايله فوق ..

ف العماير .. و الشقوق ...

ألف نجمه ع المشانق

شايله عتمه ف عرض ضوء ...

شايله قطر بيمشي سطر

و يدي سطر لعزرائيل ...

شايله مينا و عبارات

شايله مونه و سقالات

و اللي جاي زي اللي فات

و اللي مات

من غير غسيل ...

شايله كرسي و شايله كورس

من بداية عهد حورس

طبالين على زمارين ...

شايله رجل و شايله إيد

ف السلاسل و الحديد ..

شايله عبد .. و شايله سِيد ...

شايله قٌبّه .. و أٌبّهات ..

نضارات على برفانات ..

شايله قهر .. و أهرامات ...

شايله عالم كله ضد ...

ناس بتبني و ناس .. تهدّْ

ناس بترخي و ناس .. تشدّْ

شايله فوضى و مين يفضّْ ؟؟

مين يِِرٌدّْ .. و مين يٌرَدّْ ؟؟

مين يِصٌدّْ و مين .. يِسِدّْ ؟؟

مين يشيل الكمامات ؟؟

مين يرجع مصر تاني

و الصباح البرتقاني

و العيال الطيبين ؟؟؟

القصيده من ديوان الشاعر رضا أبو النجا برقم إيداع 2008 / 223

مساء الكحل على عيونهم

الوقتي حالا قبل ما آجي السايبر المصون .. حبيت أجيب سجاير .. كعاده سيئه باحب امارسها و انا قاعد قدام الجهاز ...

لفيت المحلات اللي كانت بتبيع السم الهاري ده .. كلهم أجمعوا ان مافيش ....

معقوله مفيش سجاير ف المنصورة ؟؟؟

أخيرا لقيت كشك لذيذ جبت من عنده L.M و ده طبعا مش للرسم على رواد المدونه .. أنا أصلا من رواد الكليوباترا ....

الأزمه بقى إني عرفت إن السجاير موقوفه من يومين .. و إنها هاتدخل كردون الغلا ...

معنى كده إن السجاير بقت زي الطماطم و الزيت و العدس و الحاجات الحلوه دي ....

عارفين اللي انا عرفته كمان ؟

البضايع كلها تقريبا هاتغلى ...

و كل ده عشان ما حدش قد كلمته .. كله مش قد كلمته ... و برضه الحدق يفهم .....

يوم الإضراب اللولبي

طبعا كلنا ما ننساش اليوم اللذيذ 6 / 4 / 2008 م كيوم أكبر مهزله .. قال إيه إضراب ... ولا عملوا إضراب ولا نيله ....

النهارده تاني يوم 4 / 5 / 2008 م تاني يوم مهزله في المنصورة ....

بالمناسبه السعيدة دي ....

أضربتوا ؟؟؟؟........ براااااااااااااااااافو ... هاتموتوا يا كلاب

لقمة طيش

ف لحظة طيش انا حبيت اجيب العيش

دي صورتي بتقفيل مصنعي

عدسة / ستوديو الوزير

و ده بعد ما الهبل ركبني و جبت العيش

عدسة / أحمد جميل

و حبيت ازغرط

عدسة / أيمن زيدان

و دي ابتسامة المختل بعد ما خد جزاء طيشه

عدسة / أحمد جميل

على فكره ( ملحوظه مهمة ) : الصور الهبله دي اتلقطت يوم الإضراب المزعوم 06 / 04 / 2008 من أمام المخبز الاهبل برضه .. و الحدق يفهم

أشعار اللوالبة

كنت في مهرجان شعري في كلية هندسة المنصورة يوم الاثنين اللي فات .. و طبعا جهزت نفسي لهذا الحدث الجلل ... ( على فكرة مش عيب اني لسه طالب في آداب المنصورة .. بتحصل في أحسن العائلات ) .. المهم اني كنت فاكرهم شعراء للدرجه اللي تخليهم ينظموا مهرجان ....

طبعا كنت رايح على سبيل إن فيه جوايز فلوس على أي مركز .. قلت كويس ... أهو الواحد يجيب قرشين عشان اروح مهرجان جامعة الاسماعيلية يوم الاتنين اللي جاي .. المهم رحت و قعدت في المدرج و الندوة ابتدت ....

العيال ياخويا تطلع .. كلهم عايشين دور المشيخه ... و تلات أرباعهم بدقون .. و الل بدقون تحديدا مرتبين نفسهم على جمله بيزنطيه واحده ..

( إن الشعر الذي يخلده التاريخ هو الشعر الذي يخدم القضيه و ليس شعر الغزل ) ... يانهار أبوكو كحل مجعلص بسواد .. طبعا دمي اتحرق و مرارة أهلي اتفقعت و كنت هاقل أدبي الأول .. و بعدها أفهمهم إن عمنا و عم أطفالنا نزار قباني فضل عالي طول ما كتب في الغزل لحد ما نزل من مستواه و عمل فيها ثورجي و كتب سياسي ... أنا طبعا مش ضد الشعر السياسي .. مولانا أحمد مطر ما كانش سراب .. و لكن ما كانش بيقول شعر على قد ما كان بيقول نكت .. و دي كانت بتؤخذ عليه .. أمل دنقل ذات نفسه لما تيجوا تحسبوا له هتلقوا 10 قصايد بس اللي يستاهلوا القراءة باهتمام و الباقي عادي جدا .. طبعا ده ما ينفيش أشعاره في الغرفه 8 ... بس الحمد لله أشرف توفيق سبقني و رد عليهم باللي فيه القسمه .. خصوصا و أشرف كان جاي من ضمن لجنة التحكيم و لابس بدله و شامم نفسه علينا أوي ...

طبعا أحاول اسمع شعر من كل اللي قالوا .. ماحدش ملا عيني غير 3 ولاد زي الفل بدون ذكر أسامي ( م الآخر ملوك و فرحات و ......... و بس ) جه دوري و طلعت اقول ( مرايا ) العمل اللي باحترمه قوي و باحترم نفسي ان انا اللي كاتبه ... بالتأكيد و كالمعتاد البنات سبلت و الرجالة بتحقد و الحالة ماشيه زي الفل .. و خلصت الندوه و بعدها محكم الفصحى لقيته بيقول لي ( إنتا خطير أوي .. شغلك عالي أوي .. سيبك مننا احنا ) قلت خير .. يبقى ادالك مركز أول يا لولبي يا كبير و دي فيها كالمعتاد 50 جنيه عالأقل ..

رحت النهارده أنا و ملوك صديق الدرب لكلية هندسه عشان كان ميعاد تسليم الجوايز و كل واحد مننا جايب زكيبه عشان يعبي فيها البرايز و الشلنات اللي هاتنزل ترف علينا ...

الموظفين قالوا لنا الجوايز مع مدام سميحه و هيا في مشوار هاترجع بعد ساعة .. قعدنا الساعة دي في ساحة كلية هندسه و الجو حر أوي و تحت الشمس لحد ما تفحمت و افتكروني محول طاقة من محولاتهم و لقيت عيل جايب ترانس يحطه ف قفايا عشان يشحن موبايله ... المهم استنينا الساعة دي بطولها و عرضها و بعدها رحنا نسأل على المذكورة لقينا لسه قدامها نص ساعة ...

محمد ملوك سأل سؤال لولبي بالفطرة ... يا ترى الجوايز مادية ولا عينية ... واحده طيبه من الموظفات قالت لنا " أنا شفتها بتوزع ساعات حائط و ألبومات صور .. إهئ هئ هؤ هاهاهاه " يا نهار أبوكي إسود ..... هيا ناقصاكي ؟؟؟ خليها لك .. إحنا عندنا تلال ساعات و ألبومات و ميداليات من الجامعه و جامعات تانيه كمان ... طيب ماينفعش نبدلها بفلوس ... طيب هاتوا 10 جنيه بس .. طيب أي حاجه .. طب سلام عليكم ..

و هكذا رجعت بخفي ( اللولبي ) و دول كانوا خفين أثريين من العصر العباسي الخامس .. بعتهم و اشتريت لبانه شكلتس

الخروج عن الدائرة اللولبية

طبعا اتأخرت عليكم في تدوين القضايا اللولبيه ... و ده راجع لوقوعي في إحدى هذه القضايا .. الحمد لله خلصت و هاحكي لكم النهارده حكايه مريبه .

طبعا سمعنا إن لم نكن لمسنا بأنفسنا عن ارتفاع - آسف - أقصد انفجار و انشطار و تفلسع الأسعار و دي مش حاجه جديده إن إزازة الزيت اللي كنت باشتريها ب 2 جنيه من فترة قريبة خالص بتتباع النهارده ب 10 جنيه و أكتر .

ده ف حد ذاته كفيل بإشعال نار الثورة .. لكن احنا طبعا ما اتكلمناش من باب إن من خاف سلم .. طيب .

إيه رأيكم ف اللي حصل عندنا ف المنصورة ؟

إتنين أطفال في عمر فانلتي الحمالات ( 15 سنه ) واقفين قدام كلية آداب عيل منهم فتح مطوه و غت صاحبه ف قلبه .. غتة محبه يعني .. و صاحبه يا عيني مات .. و طبعا القاتل دخل الأحداث .

طبعا هاتسألوني إيه علاقة ده بغلا يوسف اللي احنا فيه .. اقرأوا الرساله لنهايتها ...

ف نفس اليوم رحت اجيب طعميه ... مش عيب يعني لما لولبي من العظماء أمثالي ياكل طعميه ... قلت للي بيبيع يعملها لي اقراص بالسمسم .. و طبعا قمت بممارسة مهامي الوظيفية في الانتقاد .. معقوله قرصين الطعميه بقوا بربع جنيه ؟ .. فين أيام ما كنت باجيب الخمسه بنفس السعر ؟.........

لقيته بيرد عليا بتبجح .. و لسه يا محترم القرص هايوصل لجنيه .. الكرات غلى و الزيت غلى و الفول غلى و الحشيش رخص ؟

الحشيش رخص ؟... ده كان سؤالي اللولبي رغم اني مبطل الحشيش و الحمد لله بلا رجعه بقالي فتره ..

قالي القرش أنا شاريه أجازة الصيف اللي فاتت ب 80 جنيه شاريه النهارده ب 40 جنيه حتى شوف ... و راح مطلعلي القرش طبعا أنا شفته بعيني و حنيت للماضي الأليم بس خلاص على مين ... يعني ولاد الكلب ما يرخصوهوش غير بعد ما ابطل ؟؟

في نفس اليوم اكتشفت ان الواد اللي قتل صاحبه كان بسبب بنت و اتضح إن الواد ده كان شارب قبلها ...

تعالوا بقى نربط الخيوط ببعضها ............

الواد لما يكون ناقص غذا مخه مش هايشتغل صح .. ما بالكم كمان لو كان شارب ؟؟

لما المخدرات تكون متاحه .. و الأكل غير متاح يبقى أكيد لازم يطلع الجيل ده مشوه ف تفكيره ..

لازم ما نستغربش لما حتة عيل يقتل صاحبه عشان عيله زيهم ...

لازم ما نستغربش لما نسمع الطرش الأصيل و هو بيغني باحبك يا حمار .. لأن طول ما المخ معطل يبقى لازم يتعطل الإبداع ...

لازم نستغرب أوي ... لو صحينا الصبح ( ده لو طلع علينا الصبح ) ... و لقينا الحكومه ( بنت الحلال ) اتغيرت

قصة الملك اللولبي و الملكه شجرة الترمس

كان يا ما كان ...

كان فيه مره ملك إسمه اللولبي و كان ف إيده مملكة الشمال و على العكس منه كان ف مملكة الجنوب ملكه جميله و طيبه اسمها شجرة الترمس ، و كان اللولبي ظالم و أي مملكه قدامه كان بيدخلها بتوحش عاطفي لحد ما يتملك منها .

المهم شجرة الترمس سمعت عنه و خافت على مملكتها و الممالك اللي جنبها ففكرت ف خطه تبعد بيها تفكير الملك الظالم ده عن بلادها ، و قالت تديله دعوه سلميه لدخول بلدها .

طبعا اللولبي استهتر ف البدايه بالدعوه و قال ان الملكه خايفه منه و انه هايروح للمملكه بتاعتها عشان يدرس المكان استعدادا لاحتلاله .

المهم الملك وصل لبوابة مملكة شجرة الترمس لقى يافطه مكتوب عليها " لا تقترب ... قد لا تستطيع الابتعاد " بس ما خدش خوانه من الكلمة و دخل من البوابه لوحده من غير حراسه .

الملكه استقبلت اللولبي استقبال هايل جدا و رحبت ف خطابها الملكي بصاحب مملكة الشمال المعظم و بعدين عملوا احتفاليه جامده أوي جابوا فيها مدحت صالح و حماده هلال و شعبولا و ده كان مجرد احتفال بزيارة الملك المعظم .

اللولبي شاف عنين الرعيه لقى الطيبه و الجمال ف قلوبهم و بص لعيون شجرة الترمس حسسته بالضعف بعد ما كان مش همه حد ف الوجود ، حسسته انه كان ظالم أوي و إنه لازم يقلع توب الظلم اللي هو لابسه و كان توبه عباره عن عبايه من الحرير المرصع بالجواهر فلما عرضت عليه انه يقلعها كان أول سؤال عبقري طلع منه "و البس إيه ؟ "

هيا قلعته العبايه و راحت ملبساه لامؤاخذه " بدلة رقص " كانت عند رقاصه من رقاصات المملكه بتاعتها و اللولبي شك ف دينا عشان لمح حسام ابو الفتوح بيحوم حوالين المملكه .

طبعا بعد ما الملك لبس بدلة الرقص حب يجرب نفسه راح راقص على أنغام أغنية " أوجاجاجا" و " أللوووووووو " و الملكه قعدت تتفرج عليه بإعجاب لحد ما خلص نمرته ... عفوا " تجربته " و راحت مناديه على الحارس بتاعها " التاريخ ذكر الحارس ده باسم إقليدس " و قالت له ابعت هات المأذون دلوقتي حالا .

طبعا الحارس انطلق بسرعة البرق تلبية لأوامر الملكه و اللولبي فرح أوي عشان افتكر ان المأذون ده جاي يكتب كتابه على ملكة الجنوب و قعد يحلم يضم مملكة الجنوب لمملكة الشمال بتاعته و تبقى مملكه واحده قائمه بالعدل عشان هايبقى فيها نموذج للعدل و الطهر و الجمال " اللي هي طبعا الملكه شجرة الترمس زي ما خياله رسمها " .

جه الحارس و جاب في إيده عمنا المأذون و الملكه أول ما شافته قالتله " شوف بقى يا سيدنا الشيخ أنا عايزاك تكتب كتابي على الحارس اللي جابك أنا النهارده ف قمة سعادتي عشان جبت الملك اللولبي يرقص لي ف الفرح و يحيي الليله " .

طبعا الحارس قعد يتنطط من الفرحه و الرقاصه - قصدي الملك - وقف يرقص رقصة المجنونه - عفوا .. المدبوح - ...

و توته توته خلصت الحدوته .

اللولبيه ليه ؟

طبعا مش يوسف شاهين اللي بيتكلم .. أنا الإتربي اللولبي حامل راية تاريخ اللوالبة العظام ... و اللي ما عرفش تاريخ مش هايفهم ف السياسه .. و اللي ما فهمش سياسه يبقى بطيخه قرعه .. و اللي مالوش كبير بيشترى له كبير .

سؤالنا هو " اللولبيه ليه " ؟ أنا سامع ولد بيرد و يقول " عشان باموت ف السوست " اتنيل و مت ف وسط أهلك إجابه غلط ... إيه بتقولي إيه يا شاطره " عشان تنظيم الأسره " جاتها نيله اللي عايزه خلف .. غلط اتهدّي .

اللولبيه يا ولاد عشان تجميل وجه الحياه ...

ولد رزل طالع يقول " يعني نجيب الحياه و نعمل لها sweet ؟ " طبعا لأ يا واطي إزاي نعمل اللي انت بتقول عليه ف الحياه و هيا اللي عاملاه فينا و عامله اللي اكتر منه ؟ بنت سافله أوي طالعه تقول " يعني نلبس الحياه underعشان تلم نفسها و تبطل اللي بتعمله فينا " أكيد لأ لأن الحياه ياما لبست و برضه بتعمل اللي بتعمله ...

اللي انا اقصده يا حبايبي باللولبيه ان زي ما الحياه بتعمل فينا إحنا برضه نعمل ف الحياه .. على طول من غير sweet و under .. يعني بمبدأ جيلاتيني مَلْبَني عامل الحياه كبني آدم تو ما يلطشك الطشه .

طبعا فيه سؤال .. ليه ما اتغداش بالبني آدم ده قبل ما يتعشى بيا ؟ ده سؤال لولبي إجابته بسيطه جدا و هو إن كل الناس اتخلقوا لوالبه بالفطره .. و اللولبي الحقيقي إنسان مسالم و مؤمن و موحد بالله ( طبعا هاتفهم غلط و تقولوا ان اللولبيه دي ديانه جديده .. لأ يا متخلف ) اللي انا اقصده انك برغم نضافتك و رقيك كبني آدم إوعى تكون هفأ .

أتمنى اكون ضيف خفيف و ما اكونش أزعجت حد من نومه
سلام عليكم