طبعا اتأخرت عليكم في تدوين القضايا اللولبيه ... و ده راجع لوقوعي في إحدى هذه القضايا .. الحمد لله خلصت و هاحكي لكم النهارده حكايه مريبه .
طبعا سمعنا إن لم نكن لمسنا بأنفسنا عن ارتفاع - آسف - أقصد انفجار و انشطار و تفلسع الأسعار و دي مش حاجه جديده إن إزازة الزيت اللي كنت باشتريها ب 2 جنيه من فترة قريبة خالص بتتباع النهارده ب 10 جنيه و أكتر .
ده ف حد ذاته كفيل بإشعال نار الثورة .. لكن احنا طبعا ما اتكلمناش من باب إن من خاف سلم .. طيب .
إيه رأيكم ف اللي حصل عندنا ف المنصورة ؟
إتنين أطفال في عمر فانلتي الحمالات ( 15 سنه ) واقفين قدام كلية آداب عيل منهم فتح مطوه و غت صاحبه ف قلبه .. غتة محبه يعني .. و صاحبه يا عيني مات .. و طبعا القاتل دخل الأحداث .
طبعا هاتسألوني إيه علاقة ده بغلا يوسف اللي احنا فيه .. اقرأوا الرساله لنهايتها ...
ف نفس اليوم رحت اجيب طعميه ... مش عيب يعني لما لولبي من العظماء أمثالي ياكل طعميه ... قلت للي بيبيع يعملها لي اقراص بالسمسم .. و طبعا قمت بممارسة مهامي الوظيفية في الانتقاد .. معقوله قرصين الطعميه بقوا بربع جنيه ؟ .. فين أيام ما كنت باجيب الخمسه بنفس السعر ؟.........
لقيته بيرد عليا بتبجح .. و لسه يا محترم القرص هايوصل لجنيه .. الكرات غلى و الزيت غلى و الفول غلى و الحشيش رخص ؟
الحشيش رخص ؟... ده كان سؤالي اللولبي رغم اني مبطل الحشيش و الحمد لله بلا رجعه بقالي فتره ..
قالي القرش أنا شاريه أجازة الصيف اللي فاتت ب 80 جنيه شاريه النهارده ب 40 جنيه حتى شوف ... و راح مطلعلي القرش طبعا أنا شفته بعيني و حنيت للماضي الأليم بس خلاص على مين ... يعني ولاد الكلب ما يرخصوهوش غير بعد ما ابطل ؟؟
في نفس اليوم اكتشفت ان الواد اللي قتل صاحبه كان بسبب بنت و اتضح إن الواد ده كان شارب قبلها ...
تعالوا بقى نربط الخيوط ببعضها ............
الواد لما يكون ناقص غذا مخه مش هايشتغل صح .. ما بالكم كمان لو كان شارب ؟؟
لما المخدرات تكون متاحه .. و الأكل غير متاح يبقى أكيد لازم يطلع الجيل ده مشوه ف تفكيره ..
لازم ما نستغربش لما حتة عيل يقتل صاحبه عشان عيله زيهم ...
لازم ما نستغربش لما نسمع الطرش الأصيل و هو بيغني باحبك يا حمار .. لأن طول ما المخ معطل يبقى لازم يتعطل الإبداع ...
لازم نستغرب أوي ... لو صحينا الصبح ( ده لو طلع علينا الصبح ) ... و لقينا الحكومه ( بنت الحلال ) اتغيرت
الجمعة، 22 فبراير 2008
الخروج عن الدائرة اللولبية
الاشتراك في:
تعليقات الرسالة (Atom)
هناك 6 تعليقات:
السلام عليكم
اه ما انا على ما اعتقد ان ده الهدف من انتشار الحشيش والمخدرات دي
ان شبابنا يكون في غيبوبه ميعرفش الصح من الغلط ولا يعرف فين مصلحته
الموضوع كويس اوي اوي
واسلوبك حلو اوي بس ياريت تفضل على كده
يعني الموضوع ده خالي من الشوائب
ربنا يوفقك
اممممممممممم
انا جيت أمسي وأبارك
وشايفة بوادر شغب وخفة دم
إلى الأمام...مبروك
بداية تواصل انشاء الله
تحياتي
:)
حشيش ايه بس يا جدع هو حد لاقي حق الحشيش..الناس بقت تشرب سوكولانس...علي فكرة انت كاتب علي الحشيش وانا بردو كتبه عنه بالصدفه ابقه شرفني بزيارة عندي وشوف الحشيش والبانجو وكل الانواع المكيفة وببلاش.
عرفت انك جديد وانشاء الله هتبقه قديم ذي ما بتقول(في التدوين يعني)
كلامك جميل وبيناقش قضية وربطت ببراعة بين الطعمية والحشيش والغلا والخناقات والبنات والقتل والفلنة امو حمالات والغلب ...برافو
لموضوع جامد كييييييييييك مع مرتبة الشرف . تحياتى الى اللولبى الأعظم ومن الواضح جداً انك تفوقت على نفسك فى الموضوع ده .. وطبعاً ده يرجع لتأثير الحشيش الغالى لأنك لو كنت من مستخدمى الحشيش الحالى مكنتش هاتعرف تأدى بالمستوى ده وخصوصاً بعد ما الهرمونات دخلت فيه الايام دى فييييييييين بقى ايام زمان معتش حاجة ليها طعم اليومين دول .. المهم انه اجمل كوبليه عجبنى "إتنين أطفال في عمر فانلتي الحمالات ( 15 سنه ) " ولا اروع مسخرة مسخرة يعنى مش هزار الموضوع جامد جداً وقدرت فعلاً تغلف اسلوبك فى انتقاد السلبيات الموجودة فى الشارع المنصوري بأسلوب كوميدى تهكمى رائع وللأمام دائماً يا ابن طابا البار الحلزوني الأعظم .< أيمن زيدان >. حديد قلبى ياأبو حامد
لو لم أكن حلزونياً .. لوددت أن أكون لولبياً .
مساء الفل على احلى لولبى
موضوع رائع بجد والله بس قرش الحشيش ب 40 جنيه بس
ياااااااااااااااااه فين ايام لما كان ب 80 و 90 لا والله الدنيا بخير لسه
عبدالله حافظ
إرسال تعليق