الخروج عن الدائرة اللولبية

طبعا اتأخرت عليكم في تدوين القضايا اللولبيه ... و ده راجع لوقوعي في إحدى هذه القضايا .. الحمد لله خلصت و هاحكي لكم النهارده حكايه مريبه .

طبعا سمعنا إن لم نكن لمسنا بأنفسنا عن ارتفاع - آسف - أقصد انفجار و انشطار و تفلسع الأسعار و دي مش حاجه جديده إن إزازة الزيت اللي كنت باشتريها ب 2 جنيه من فترة قريبة خالص بتتباع النهارده ب 10 جنيه و أكتر .

ده ف حد ذاته كفيل بإشعال نار الثورة .. لكن احنا طبعا ما اتكلمناش من باب إن من خاف سلم .. طيب .

إيه رأيكم ف اللي حصل عندنا ف المنصورة ؟

إتنين أطفال في عمر فانلتي الحمالات ( 15 سنه ) واقفين قدام كلية آداب عيل منهم فتح مطوه و غت صاحبه ف قلبه .. غتة محبه يعني .. و صاحبه يا عيني مات .. و طبعا القاتل دخل الأحداث .

طبعا هاتسألوني إيه علاقة ده بغلا يوسف اللي احنا فيه .. اقرأوا الرساله لنهايتها ...

ف نفس اليوم رحت اجيب طعميه ... مش عيب يعني لما لولبي من العظماء أمثالي ياكل طعميه ... قلت للي بيبيع يعملها لي اقراص بالسمسم .. و طبعا قمت بممارسة مهامي الوظيفية في الانتقاد .. معقوله قرصين الطعميه بقوا بربع جنيه ؟ .. فين أيام ما كنت باجيب الخمسه بنفس السعر ؟.........

لقيته بيرد عليا بتبجح .. و لسه يا محترم القرص هايوصل لجنيه .. الكرات غلى و الزيت غلى و الفول غلى و الحشيش رخص ؟

الحشيش رخص ؟... ده كان سؤالي اللولبي رغم اني مبطل الحشيش و الحمد لله بلا رجعه بقالي فتره ..

قالي القرش أنا شاريه أجازة الصيف اللي فاتت ب 80 جنيه شاريه النهارده ب 40 جنيه حتى شوف ... و راح مطلعلي القرش طبعا أنا شفته بعيني و حنيت للماضي الأليم بس خلاص على مين ... يعني ولاد الكلب ما يرخصوهوش غير بعد ما ابطل ؟؟

في نفس اليوم اكتشفت ان الواد اللي قتل صاحبه كان بسبب بنت و اتضح إن الواد ده كان شارب قبلها ...

تعالوا بقى نربط الخيوط ببعضها ............

الواد لما يكون ناقص غذا مخه مش هايشتغل صح .. ما بالكم كمان لو كان شارب ؟؟

لما المخدرات تكون متاحه .. و الأكل غير متاح يبقى أكيد لازم يطلع الجيل ده مشوه ف تفكيره ..

لازم ما نستغربش لما حتة عيل يقتل صاحبه عشان عيله زيهم ...

لازم ما نستغربش لما نسمع الطرش الأصيل و هو بيغني باحبك يا حمار .. لأن طول ما المخ معطل يبقى لازم يتعطل الإبداع ...

لازم نستغرب أوي ... لو صحينا الصبح ( ده لو طلع علينا الصبح ) ... و لقينا الحكومه ( بنت الحلال ) اتغيرت

قصة الملك اللولبي و الملكه شجرة الترمس

كان يا ما كان ...

كان فيه مره ملك إسمه اللولبي و كان ف إيده مملكة الشمال و على العكس منه كان ف مملكة الجنوب ملكه جميله و طيبه اسمها شجرة الترمس ، و كان اللولبي ظالم و أي مملكه قدامه كان بيدخلها بتوحش عاطفي لحد ما يتملك منها .

المهم شجرة الترمس سمعت عنه و خافت على مملكتها و الممالك اللي جنبها ففكرت ف خطه تبعد بيها تفكير الملك الظالم ده عن بلادها ، و قالت تديله دعوه سلميه لدخول بلدها .

طبعا اللولبي استهتر ف البدايه بالدعوه و قال ان الملكه خايفه منه و انه هايروح للمملكه بتاعتها عشان يدرس المكان استعدادا لاحتلاله .

المهم الملك وصل لبوابة مملكة شجرة الترمس لقى يافطه مكتوب عليها " لا تقترب ... قد لا تستطيع الابتعاد " بس ما خدش خوانه من الكلمة و دخل من البوابه لوحده من غير حراسه .

الملكه استقبلت اللولبي استقبال هايل جدا و رحبت ف خطابها الملكي بصاحب مملكة الشمال المعظم و بعدين عملوا احتفاليه جامده أوي جابوا فيها مدحت صالح و حماده هلال و شعبولا و ده كان مجرد احتفال بزيارة الملك المعظم .

اللولبي شاف عنين الرعيه لقى الطيبه و الجمال ف قلوبهم و بص لعيون شجرة الترمس حسسته بالضعف بعد ما كان مش همه حد ف الوجود ، حسسته انه كان ظالم أوي و إنه لازم يقلع توب الظلم اللي هو لابسه و كان توبه عباره عن عبايه من الحرير المرصع بالجواهر فلما عرضت عليه انه يقلعها كان أول سؤال عبقري طلع منه "و البس إيه ؟ "

هيا قلعته العبايه و راحت ملبساه لامؤاخذه " بدلة رقص " كانت عند رقاصه من رقاصات المملكه بتاعتها و اللولبي شك ف دينا عشان لمح حسام ابو الفتوح بيحوم حوالين المملكه .

طبعا بعد ما الملك لبس بدلة الرقص حب يجرب نفسه راح راقص على أنغام أغنية " أوجاجاجا" و " أللوووووووو " و الملكه قعدت تتفرج عليه بإعجاب لحد ما خلص نمرته ... عفوا " تجربته " و راحت مناديه على الحارس بتاعها " التاريخ ذكر الحارس ده باسم إقليدس " و قالت له ابعت هات المأذون دلوقتي حالا .

طبعا الحارس انطلق بسرعة البرق تلبية لأوامر الملكه و اللولبي فرح أوي عشان افتكر ان المأذون ده جاي يكتب كتابه على ملكة الجنوب و قعد يحلم يضم مملكة الجنوب لمملكة الشمال بتاعته و تبقى مملكه واحده قائمه بالعدل عشان هايبقى فيها نموذج للعدل و الطهر و الجمال " اللي هي طبعا الملكه شجرة الترمس زي ما خياله رسمها " .

جه الحارس و جاب في إيده عمنا المأذون و الملكه أول ما شافته قالتله " شوف بقى يا سيدنا الشيخ أنا عايزاك تكتب كتابي على الحارس اللي جابك أنا النهارده ف قمة سعادتي عشان جبت الملك اللولبي يرقص لي ف الفرح و يحيي الليله " .

طبعا الحارس قعد يتنطط من الفرحه و الرقاصه - قصدي الملك - وقف يرقص رقصة المجنونه - عفوا .. المدبوح - ...

و توته توته خلصت الحدوته .

اللولبيه ليه ؟

طبعا مش يوسف شاهين اللي بيتكلم .. أنا الإتربي اللولبي حامل راية تاريخ اللوالبة العظام ... و اللي ما عرفش تاريخ مش هايفهم ف السياسه .. و اللي ما فهمش سياسه يبقى بطيخه قرعه .. و اللي مالوش كبير بيشترى له كبير .

سؤالنا هو " اللولبيه ليه " ؟ أنا سامع ولد بيرد و يقول " عشان باموت ف السوست " اتنيل و مت ف وسط أهلك إجابه غلط ... إيه بتقولي إيه يا شاطره " عشان تنظيم الأسره " جاتها نيله اللي عايزه خلف .. غلط اتهدّي .

اللولبيه يا ولاد عشان تجميل وجه الحياه ...

ولد رزل طالع يقول " يعني نجيب الحياه و نعمل لها sweet ؟ " طبعا لأ يا واطي إزاي نعمل اللي انت بتقول عليه ف الحياه و هيا اللي عاملاه فينا و عامله اللي اكتر منه ؟ بنت سافله أوي طالعه تقول " يعني نلبس الحياه underعشان تلم نفسها و تبطل اللي بتعمله فينا " أكيد لأ لأن الحياه ياما لبست و برضه بتعمل اللي بتعمله ...

اللي انا اقصده يا حبايبي باللولبيه ان زي ما الحياه بتعمل فينا إحنا برضه نعمل ف الحياه .. على طول من غير sweet و under .. يعني بمبدأ جيلاتيني مَلْبَني عامل الحياه كبني آدم تو ما يلطشك الطشه .

طبعا فيه سؤال .. ليه ما اتغداش بالبني آدم ده قبل ما يتعشى بيا ؟ ده سؤال لولبي إجابته بسيطه جدا و هو إن كل الناس اتخلقوا لوالبه بالفطره .. و اللولبي الحقيقي إنسان مسالم و مؤمن و موحد بالله ( طبعا هاتفهم غلط و تقولوا ان اللولبيه دي ديانه جديده .. لأ يا متخلف ) اللي انا اقصده انك برغم نضافتك و رقيك كبني آدم إوعى تكون هفأ .

أتمنى اكون ضيف خفيف و ما اكونش أزعجت حد من نومه
سلام عليكم